Bikol Bible - 1 Pedro 4:8

Above all, love each other deeply, because love covers over a multitude of sins. 1 Peter 4:8

- Bikolandia

CABAYONG TABLA: BUHAY NI DON PRINCIPE DON JUAN ASIN SI PRINCESSA DONA MARIA

1

Nagtao nin galang sa saindo gabos

sa magña madunong o aki pang pospos
acong minalagda historiang masayod
sa sacong pag-iisip togotan man logod.

An magña sacayan can panahon una
may apat na bitis iyong naghihila
gñonian magña tugang sato nan nakita
igua na nin pacpac naglalayog na makina.

Dai man nagsala can enot na aldao
an hula sa sato nin magña magurang
kitang magña aki maheling ta gñonian
sari-sari sana magña gñagñalasan.

Can magña panahon olay ponograpo
asin pa an iba gñaran na de cuno
gñonian man manangad nagpaca-totoo
sato nang nakita an gñaran na radio

Igua na nin auto na nagdadalagan
magña telepono asin cine dian
vapor eroplano daing pagdarang-gan
dian sa tinampo maghay paglunadan

2

Idtong magña hula totoo mananggad

dai suminala sa banal na surat
na con domunong na an liualang liuat
magña sari-sari dian magluluas.

Bayaan co mona testong iniho
na mapapadapit cainihong mundo
an sarong historia an isosonod co
na Cabayong Tabla an isosonod co.

Gñonian poponan co an sarong historia
na gñinagñaranan na Cabayong Tabla
agua man nin cuerdas na orog caogma
na agui sa daga asin itaas pa.

Oh Dios na halangcao may capangyarihan
acong ovejas mo saimong tabagñan
na macapaglagda o maca pag saysay
na sarong historia na orog carahay.

Ta ica an Virgen na orog caogma
itaas nin lagñit sarong emperadora
an sacong pag-iisip dagdagan mo Ina
na dai cumolang an sacong historia.

Magña Evangelistang apat iyong cagsurat
digdi sa kinaban iyong nagtalastas
iyong pag sonodon na pigpapahayag
si-iisay man digdi mundong maliuanag.

Hagad co saindo na aco tabagñan
an sacuyang isip asin boot na man
na macapaglagda sa saindo gñonian
nin sacuyang dila na macapag saysay.

Sa catiriponan gñaran auditorio
selinciong cadikit an hinahagad co
hinanioga tabi an sasabihon co
na sarong historia gñonian sa saindo.

Can magña panahon nin tiempong haloy na
digdi sa kinaban can nabubuhay pa
ining sarong Hade na si Don Mendoza
iyong naghahade sa Reinong Valencia.

Iguang sarong aki na pinacamahal
si Don Juan baga iyo an pagñaran
marhay an ugale sa kiisay pa man
tolos mina cuyog pag sogo nin gurang.

Asu sarong aldao an oras malipot
ining si Don Juan saiyang inapod
dai man nahaloy sia dominuloc
an boot nin ama mag agom na logod.

AGUI-AGUI NI DONA FLOSERFIDA ASIN NI DON JUAN TIÑOSO

1

Halangcao na Virgen Abogada Nuestra

dating maugayon na parasorog sia

tabangan mo gñani halipot cong ciencia

caining ioosip na sarong novela

Pinaglalaom co an pagcaherac mo

Virgen na nagñidam sa Verbo Divino

tagñaning manoltol an isusurat co

na pakinabagñan nin capua tauo.

Cun caya po gñani o magña tugang co

aco minahagad dikit na selencio

paghinaniog gñani camahalan nindo

can sarong bareta na sasabihon co

Duman sa ciudad sa Reinong Ungria

bantog na Don Diego can nabubuhay pa

haloyon nang aldao na nabalo sia

asin iguang aqui apat na princesa.

An matua gñani gñaran Dña Juana

icadua naman ining Dña Laura

inihong icatolo an gñaran Flora

asin an icaapat Dña Floserfida.

Nagpaorog orog cagayonan ninda

siring sa bitoon o sarong cometa

cun caya pa gñani sinda an daraga

papagñaninohan paghilgñon nin mata

2

Orog pa sainda ining icaapat

ining Floserfidang dai nin casugad

an cahalimbawa idtong sarong burac

na sa Jarden gñani sia minabucad

Balakid na gayo an nagñagtutuyo

Hade man Principe taga ibang Reino

Duque, COnde, Marques magña Caballero

parating nasakat sa real Palacio

Tara ini sinda lihisan co gñona

iyo cong sabihon hade sa Valencia

an gñaran si Artus daculang monarea

Dña Blanca naman iyo an esposa

Iguang sarong aking principeng hagbayon

Don Juan Tiñoso, gñaran manoyoon

dai nin cabarang lalaking magayon

mabagsic, malicsi orog pa sa rigon

Aki siang maboot iguang cabanalan

pagñaco sa Dios Hadeng calagñitan

asin an saro pa iguang cabagsican

patin may devocion sa Virgen na Mahal

tara an nangyari cadtong sarong aldao

lipogñao dumatong sa Principeng mahal

huminilig sia ta nagpuropasiar

caidtong plaza caiyan cahadean

Tolos pagcatogñod duman cadtong fuerta

Principe lominaog sa carcel nagdagos na

an mauot nin puso hihilgñon nia

an gabos na priso, vivisitahon pa

Digdi nia nadagñog idtong panambitan

an magña pagtagñis macaporopogñao

nin sarong Giganteng pinagdudusahan

sarong bartolina an namomogtacan

Na an pag-agagha an olay iniho

o principe gñaya na cagurangnan co

magdalita Señor na hinaniogon mo

acong nagtatagñis sarong pobreng preso.

HISTORIA CAN VIDA NIN SIETE INFANTES NA MAGNA AQUI NI BUSTO DE LARA - PRIMERA PARTE

1

Caidtong panahon Españang banuaan

may dua catauo magtugang na mahal

si Rubio Velasquez sa lalaking gñaran

asin Doña Sancha an babae naman.

Idtong Doña Sancha napagñagom sia

can aki ni Señor Gonzalo de Lara

an apod can gñaran si Busto de Lara

nagñaki nin pito nagadan an ina.

Dorogñan, pig-aki an pitong lalaki

idtong magcarambal an sa libro sabi

asin ta paradis an gayon na labi

cayacon apodon ay Siete Infante.

Idtong magturogang Infantes de Lara

pararehong cosog, caisogan ninda

nabaretanghayag na catacataca

pinagcatacutan bilog na Morisma

Si Rubio Velasquez Villarin na señor

sa pitong sobrino tunay na amaon

napacasal gñani sa sarong magayon

na si Doña Lambra gñaran con apodon.

Sabihon pa baga an ogmang totoo

pagcasal sainda can aldao na idto

ogmang gayagaya kinamtan na gayo

magña panaohon grandes maguinoo.

2

Tara sa pagcacan duman sa lamesa

an novia nagtaram na si Doña Lambra

tadao nagtucao man Infantes de Lara

magña akion pa makiharampang na.

An de Larang gñohod aking icapito

iyong sominimbag gñaran si Gonzalo

lamesa nin Hade minatucao aco

gurano pa baga lamesang iniho.

Agom ca pa sana ni Señor Villarin

baco pa man Reina, marhay ca na saguin

dimo cami sucat sopogon nin siring

sa dacul na tauo matang naghihiling.

Sa angot ni lambra sa ki Don Gonzalo

pinalagan tolos nin dugo an vaso

olay sa oripon lacao ulaan mo

an gubing sa hauac Gonzalong letrado.

ta ugaleng dati can enot na aldao

bububuan dugo an na aangotan

tanda gñaning sayod can saiyang buhay

na iyong mapatod canayon madamay.

Nagsonod man tolos oripon na hayag

gubing ni Gonzalo sa dugo tinogmac

saca dumalagan an tulin di hamac

na sa cagurangnan dumoloc nangad.

Angot si Gonzalo dai nin casama

oripon linamag, lapnot an espada

an guinibo lalang nin Señorang Lambra

tolos sinocloban can saiyang saya.

Sa lugar man sana can saiyang tinabon

guinadan man tolos nagtagong oripon

dagñan paghiling co sa sacong amaon

sa ining Don Rubio damay sa canayon.

Sa bagay na idto sabihon pa baga

pagtagñis sa agom caidtong si Lambra

sa saimong sobrino guinibong venganza

icagagadan co na daing pagsala.

Con di mo bogtacannin bolong na tapal

sa saimong sobrino na capagpahasan

maghohogot acong rogaring magadan,

di magñagñanogon sa capot con buhay.

An simbag nin Conde sa agom na ragña

baga man aram co na icang may sala

pagcamoot simo orog sa sainda

ama nia, aki iyong magdudusa.